ໜ້າທຳອິດ ຂ່າວສານຂ່າວ ກອງປະຊຸມ-ສຳມະນາ ໜ່ວຍພັກສະຖາບັນພະລັງງານທົດແທນ ແລະ ວັດສະດຸໃໝ່ ໄດ້ຈັດພິທີຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສໍາຮອງ ແລະ ເລື່ອນສະມາຊິກພັກສຳຮອງຂຶ້ນ ເປັນສະມາຊິກພັກສົມບູນ

ໜ່ວຍພັກສະຖາບັນພະລັງງານທົດແທນ ແລະ ວັດສະດຸໃໝ່ ໄດ້ຈັດພິທີຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສໍາຮອງ ແລະ ເລື່ອນສະມາຊິກພັກສຳຮອງຂຶ້ນ ເປັນສະມາຊິກພັກສົມບູນ

ໂດຍ admin
47 ເບີ່ງ
ໃນຕອນເຊົ້າວັນທີ 8 ທັນວາ 2020, ທີ່ຫ້ອງປະຊຸມ ຂອງສະຖາບັນຄຸ້ມຄອງວິທະຍາສາດ ແລະ ເຕັກໂນໂລຊີ, ກະຊວງວິທະຍາສາດ ແລະ ເຕັກໂນໂລຊີ (ກວຕ) ໜ່ວຍພັກສະຖາບັນພະລັງງານທົດແທນ ແລະ ວັດສະດຸໃໝ່ ໄດ້ຈັດພິທີຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສໍາຮອງ ແລະ ເລື່ອນສະມາຊິກພັກສຳຮອງຂຶ້ນ ເປັນສະມາຊິກພັກສົມບູນຂອງພັກປະຊາຊົນປະຕິວັດລາວໂດຍໄດ້ຮັບກຽດການເຂົ້າຮ່ວມເປັນປະທານຂອງ ສະຫາຍ ປອ. ສຸລິອຸດົງ ສູນດາລາ, ຄະນະພັກກະຊວງ, ປະທານກວດກາພັກ, ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ມີບັນດາສະຫາຍເລຂາໜ່ວຍພັກ, ຮອງເລຂາໜ່ວຍພັກ ແລະ ສາມອົງການຈັດຕັ້ງ ອ້ອມຂ້າງກະຊວງ ພ້ອມດ້ວຍສະມາຊິກພັກພາຍໃນໜ່ວຍພັກ ສະຖາບັນພະລັງງານທົດແທນ ແລະ ວັດສະດຸໃໝ່ ເຂົ້າຮ່ວມຢ່າງພ້ອມພຽງ.
ຈຸດປະສົງຂອງການຈັດພິທີໃນຄັ້ງນີ້ ແມ່ນເພື່ອຮັບເອົາມາຫາຊົນຜູ້ທີ່ມີຜົນງານດີເດັ່ນປະກອບສ່ວນເຄື່ອນໄຫວວຽກງານຂະບວນການຮອບດ້ານ, ຜູ້ທີ່ມີຄວາມຮູ້ ຄວາມສາມາດ, ມີຄວາມຫ້າວຫັນໃນໜ້າທີ່ວຽກງານ, ມີທັດສະນະທາງດ້ານການເມືອງທີ່ຫຼັກໝັ້ນ, ມີແນວຄິດອຸ່ນອຽນທຸ່ນທ່ຽງ, ຄວາມສາມັກຄີ, ຕັ້ງໜ້າຝຶກຝົນຫຼໍ່ ຫຼອມຕົນເອງ, ປະກອບສ່ວນເຂົ້າໃນວຽກງານທີ່ໄດ້ຮັບມອບໝາຍ ແລະ ຖືກຕ້ອງຕາມມາດຖານ-ເງື່ອນໄຂ ຂອງລະບຽບຂອງພັກປະຊາຊົນປະຕິວັດລາວວາງອອກ ຈົນໄດ້ຮັບຄວາມໄວ້ເນື້ອເຊື່ອໃຈຈາກບັນດາສະມາຊິກພັກ ກໍຄື ຄະນະໜ່ວຍພັກເພື່ອຮັບຮອງເອົາ ເຂົ້າເປັນສະມາຊິກຂອງພັກປະຊາຊົນປະຕິວັດລາວ.
ໃນພິທີດັ່ງກ່າວ, ສະຫາຍ ນ ໄມຕີ ວົງຄຳຊາວ, ເລຂາໜ່ວຍພັກ ສະຖາບັນພະລັງງານທົດແທນ ແລະ ວັດສະດຸໃໝ່ ໄດ້ຂຶ້ນຜ່ານມະຕິຕົກລົງ ວ່າດ້ວຍການຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ຂອງໜ່ວຍພັກສະຖາບັນພະລັງງານທົດແທນ ແລະ ວັດສະດຸໃໝ່ ຈໍານວນ 03 ສະຫາຍ, ຍິງ 01 ສະຫາຍ ແລະ ຜ່ານມະຕິຕົກລົງຂອງຄະນະພັກກະຊວງ ວ່າດ້ວຍການເລື່ອນສະມາຊິກພັກສຳຮອງ ເລື່ອນຂຶ້ນເປັນສະມາຊິກພັກສົມບູນ ຈໍານວນ 01 ສະຫາຍ.
ໃນຕອນທ້າຍຂອງພິທີ, ຍັງໄດ້ເປັນກຽດຮັບຟັງການໂອ້ລົມຂອງ ສະຫາຍ ປອ.ສຸລິອຸດົງ ສູນດາລາ, ຄະນະພັກກະຊວງ, ປະທານກວດກາພັກ, ຮອງລັດຖະ ມົນຕີ ກວຕ, ຊຶ່ງສະຫາຍ ໄດ້ສະແດງຄວາມຍ້ອງຍໍຊົມເຊີຍຕໍ່ສະມາ ຊິກພັກສໍາຮອງ ແລະ ສົມບູນໃໝ່. ພ້ອມນັ້ນ, ສະຫາຍຍັງໄດ້ກ່າວເນັ້ນໜັກໃຫ້ບັນດາໜ່ວຍພັກດັ່ງກ່າວ ສືບຕໍ່ກໍ່ສ້າງບັນດາສະມາຊິກພັກສໍາຮອງໃໝ່ ໃຫ້ສາມາດເລື່ອນເປັນສາມາຊິກພັກສົມບູນໃນຕໍ່ໜ້າ ແລະ ສືບຕໍ່ກໍ່ສ້າງມາຫາຊົນກ້າວໜ້າ ຜູ້ທີ່ມີຄວາມຮູ້ຄວາມສາມາດ, ມີຄວາມຫ້າວຫັນໃນໜ້າທີ່ວຽກງານ ແລະ ເປັນຜູ້ທີ່ມີມາດຖານເງື່ອນໄຂ ເພື່ອກ້າວເຂົ້າເປັນສະມາຊິກພັກ ຂອງພັກປະຊາຊົນປະຕິວັດລາວ. ສະຫາຍ ໄດ້ຮຽກຮ້ອງໃຫ້ສະ ມາຊິກພັກທັງເກົ່າ ແລະ ໃໝ່ ສືບຕໍ່ຮັກສາມູນເຊື້ອຄຸນສົມບັດສິນທຳປະຕິວັດ, ຍົກສູງຄວາມສາມັກຄີໃຫ້ເປັນປຶກແຜ່ນກັບບັນດາໝູ່ເພື່ອນສະຫາຍສະມາຊິກພັກດ້ວຍກັນ ກໍຄື ບັນດາມະຫາຊົນກ້າວໜ້າ, ເພື່ອເຮັດແນວໃດໃຫ້ກາຍເປັນຕົວແບບ, ກາຍເປັນແບບຢ່າງຂອງສະມາຊິກພັກປອດໃສ, ເຂັ້ມແຂງ, ໜັກແໜ້ນ.
ພ້ອມນັ້ນ, ກໍເພີ່ມທະວີຄວາມຮັບຜິດຊອບຕໍ່ໜ້າທີ່ວຽກງານຂອງຕົນ, ມີສະຕິຕໍ່ການຈັດຕັ້ງສູງ, ຢຶດໝັ້ນ ແລະ ເປັນເອກະພາບຕໍ່ແນວທາງນະໂຍບາຍຂອງ ພັກ-ລັດ, ສືບຕໍ່ຍົກລະດັບຄວາມຮູ້ຄວາມສາມາດຂອງຕົນ, ເພື່ອພ້ອມກັນນໍາເອົາວຽກງານວິທະຍາສາດ ແລະ ເຕັກໂນໂລຊີ ເຂົ້າໃນການພັດທະນາເສດຖະກິດ-ສັງຄົມ ຂອງປະເທດລາວເຮົາ ໃຫ້ມີຄວາມຈະເລີນກ້າວໜ້າຂຶ້ນເລື້ອຍໆ.

ຂ່າວທີ່ກ່ຽວຂ້ອງ

error: ເນື້ອໃນ ຢູ່ເວັບໄຊນີ້ຖືກປ້ອງກັນ !! Content is protected !!